اہل بیت(ع) نیوز ایجنسی ۔ ابنا ۔ کی رپورٹ کے مطابق شیعہ رہنماؤں کی جانب سے پارا چنار کی نیو سبزی منڈی میں ہونیوالے دھماکے شدید الفاظ میں مذمت کی گئی ہے جبکہ شیعہ علماء کونسل کے سربراہ علامہ ساجد علی نقوی نے واقعہ کی شدید مذمت کی اور انہوں نے اپنے بیان میں کہا ہے کہ دہشتگرد انسانیت کے دشمن اور خونی درندے ہیں، دہشتگردی کے حملے میں قیمتی انسانی جانوں کے ضیاع پر افسوس کا اظہار کرتے ہیں۔ انہوں نے کہا کہ دہشتگردی کے خاتمے کیلئے مزید سخت اقدامات اٹھانے کی ضرورت ہے۔
مجلس وحدت مسلمین نے افسوسناک سانحہ پر 3 روزہ سوگ کا اعلان کر دیا ہے۔ علامہ ساجد نقوی، علامہ راجا ناصر عباس، علامہ عارف حسین واحدی، علامہ سبطین سبزواری، سید ناصر عباس شیرازی، علامہ مبارک موسوی، علامہ ابوذر مہدوی ودیگر رہنماؤں نے مذمتی بیانات جاری کئے ہیں۔ علامہ راجا ناصر عباس نے واقعہ کی مذمت کرتے ہوئے کہا ہے کہ پُرامن شہریوں کو نشانہ بنا کر دہشتگردوں نے بربریت کی تاریخ رقم کی ہے، اس المناک سانحے کی بھرپور مذمت کرتے ہیں۔ علامہ راجا ناصر عباس نے کہا کہ دہشتگردوں کے سہولت کاروں اور سیاسی سرپرستوں کیخلاف کاروائی کیے بغیر اس عفریت سے قوم کو نجات ملنا ممکن نہیں، پاراچنار کے عوام کو حب الوطنی کی سزا دی جا رہی ہے، حکومت اور انتظامیہ کرم ایجنسی میں دہشتگردوں کیخلاف کارروائی کرنے کی بجائے وہاں کے پُرامن عوام کو ہراساں کرنے میں مصروف ہیں۔ انہوں نے کہا کہ نااہل حکمرانوں کی بیلنس پالیسیوں کے سبب دہشتگردوں کی حوصلہ افزائی ہو رہی ہے۔
۔۔۔۔۔۔۔
/169
